قرطاس الحب

كتبه كتب في 30 يوليو 2021 - 4:49 م
مشاركة

” ريف رس ” 30 يوليوز 2021

يقلم: المغتربة نادية بوشلوش عمران

خطفت الضو

من عيون الغراب

طاح الليل

غطى وجه التراب

حكى لي حكاية العذاب

و گالي

لجا تضر

غصة في الحناجر

واخا يكون

يابس و رطب و خضر

خطفت الريح

من ريش النسر

كسكست الطعام

المالح و الحلو

في لحظة

بكات النفوس

تسربات الروح

عند خالقها

و هربت الرياح

عند مول الدنيا

سولت راسي

و آش باقى؟؟؟

من شي خبار زينة!!

واش!!!

باقي شي حاجة تسر ؟

لعبت الريح

حتى شبعت في المرح

و في لحظة

دارت براسي تتشطح

طمع و طاعون

تقسم المقسوم على المكتوب

واش …

باقي شي حاجة تسر؟؟؟

خطفت التراب

من بين أبواب القصور

حللتو بالماء المسحور

طرزتتوا الأيام في ليل الغيلان

حكا لي سروا المحكور

رسالة من شدڨ الخبز المحروگ

بالطبل و بالغيوان

و أنا على قنديلي صابر

شموع الحب فوق راسي تتدور

و شفت العجب المستور

خطفت العافية

من الزهر المحروك

شكيت….في زهر الشعب

واش!!!

كان ساكن في جنانات العافية

و قرطاس الحب ما بقى يدور

واش!!!!

كان ولد التراب صابر و مضرور

واش!!!

كان واكل العصا و الشوك

شفت الإيام المذهبة

ما بين النوم و الغفلة

جا الليل و طلع النهار

طار السلهام ،و كتبت الأقلام

على وراق القصدير

و ترفعت الأعمال

فوق الأعلام

شفت الحجر و الطوب

يا بنت الشعب

شعلي ضوك

كتبي بقلامك

على قطرات السما

أحلامك ،

مسحي همومك من جفونك

قرطاسة الورد تقتل ظنونك

بلاد العرب تسرقت منها الشموس

عانات بلا حس النفوس

تقرقبت السوارت ،

و صدق ليها وارث

قرطاس السم يعمر و يدس

تقلب الساس و ما لقالوا أساس

فاز الوسواس و ضرب الريوس بالفاس

تراب الحب نخروا السوس

و باقات حلاوة في أيام الباكور

على لواحات الصلصال

تعليقات الزوار ( 0 )

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: المحتوى محمي !!
شهادة الملائمة مسلمة بتاريخ 26 / 7 / 2019 تحت عدد : 02 / 2019